Who is Patriot?ದೇಶಭಕ್ತ ಅಂದರೆ ಯಾರು ?

ನಮ್ಮ ರಾಷ್ಟ್ರದಲ್ಲಿ ಅನೇಕ ಅವತಾರಗಳಾದವು. ಆದರೆ ಇಂದು ಅವುಗಳದ್ದೇನು ಉಳಿದಿದೆ? ಅವರ ಹೆಸರಿನಲ್ಲಿ ಕೇವಲ ಹಬ್ಬ , ವ್ರತ, ಭಜನೆ, ಪೂಜೆ ಮಾತ್ರ ನಡೆಯುತ್ತದೆ. ಏಕೆಂದರೆ ವ್ಯಕ್ತಿನಿರಪೇಕ್ಷ ಕರ್ತವ್ಯ ಪರಾಯಣತೆಯ ಭಾವನೆಯ ಪ್ರಭಾವ ಮತ್ತು ಪರಂಪರೆ ನಿರ್ಮಾಣವಾಗಲಿಲ್ಲ. ಅಂತಹ ಪ್ರವಾಹವನ್ನು ನಿರ್ಮಿಸುವ, ಅದು ಚಿರಂತನವಾಗಿ ಪ್ರವಹಿಸುವಂತೆ ಮಾಡುವ ವ್ಯವಸ್ಥೆಯಾಗಲಿಲ್ಲ. ಬಹುಶಃ ಆ ಮಹಾಪುರುಷರಿಗೆ ಅಂತಹ ಕಾಲಾವಕಾಶ ಸಿಕ್ಕಿರಲಿಕ್ಕಿಲ್ಲ. ನಿರ್ಮಾಣವಾಗಿದ್ದ ಪ್ರವಾಹವು ಬತ್ತಿಹೋಗಿರಲಿಕ್ಕೂ ಸಾಕು. ಪ್ರವಾಹ ನಿರ್ಮಾಣವಾಗಲಿಲ್ಲ ಅಥವಾ ಹೆಚ್ಚು ಸಮಯ ಉಳಿಯಲಿಲ್ಲ ಎಂಬುದಂತೂ ಸತ್ಯ. ಲೋಕಮಾನ್ಯ ತಿಲಕರ ಉದಾಹರಣೆಯಂತೂ ಬಹಳ ನಿಕಟವಾದದ್ದು. ಅವರಿದ್ದಾಗ ಅಸಂಖ್ಯ ಜನರು ಅವರ ಹತ್ತಿರ ಸೇರುತ್ತಿದ್ದರು ಆದರೆ ಅವರು ಮಾಡಿದ ಕಾರ್ಯ ಅವರೊಂದಿಗೆ ಸಮಾಪ್ತವಾಯಿತು. ಗಾಂಧೀಜಿಯದಂತೂ ಅವರ ಮೃತ್ಯುವಿನ ಮೊದಲೇ ಸರ್ವನಾಶವಾಯಿತು. ಇವತ್ತು ಅವರ ಜಯಜಯಕಾರವಾಗುತ್ತಿರಬಹುದು. ವೇಷಭೂಷಣದಲ್ಲಿ ಅವರ ಬಾಹ್ಯಾನುಕರಣೆ ಆಗುತ್ತಿರಬಹುದು, ಆದರೆ ಅದರಲ್ಲಿ ಪರಂಪರೆಯ ಸೂತ್ರವಿಲ್ಲ. ರಾಷ್ಟ್ರಭಕ್ತಿಯ ಗಂಗೆಯು, ಪರಂಪರೆಯ ನಿರ್ಮಾಣವಾಗದೆ ಇದ್ದ ಕಾರಣದಿಂದ ಬತ್ತಿಹೋಯಿತು ಹಾಗೂ ಆ ಭಾವನೆಯ ಅಭಾವದಿಂದಾಗಿ ದೇಶದ ಮೇಲೆ ಅನೇಕ ಆಪತ್ತುಗಳು ಎರಗಿದವು. ಇದು ನಮ್ಮ  ಇತಿಹಾಸದ ಅನುಭವ. ಸಾವಿರ ವರ್ಷಗಳ ಇತಿಹಾಸದ ನಿರ್ಣಯವೇನೆಂದರೆ – ಕಾಕಾಲಕ್ಕೆ ಯಾರೋ ಒಬ್ಬ ವ್ಯಕ್ತಿಯಲ್ಲಿ  ರಾಷ್ಟ್ರಭಕ್ತಿಯ ಭಾವನೆ ಜಾಗೃತವಾಯಿತು. ಆ ವ್ಯಕ್ತಿಯ ಪ್ರಭಾವದಿಂದ – ವ್ಯಕ್ತಿ ನಿರಪೇಕ್ಷ ದೇಶಪ್ರೇಮದಿಂದ ಅಲ್ಲ – ಜನರು ಒಟ್ಟಾದರು, ಅವರು ಕೆಲಸ ಮಾಡಿದರು. ಆ ವ್ಯಕ್ತಿಯ ಅನಂತರ ಅಷ್ಟೇ ಪ್ರಭಾವವುಳ್ಳ ವ್ಯಕ್ತಿ ಯೊಬ್ಬ  ಬಂದರೆ ಕಾರ್ಯವು ಸಾಗುತ್ತಿತ್ತು ಇಲ್ಲವಾದರೆ ಇಲ್ಲ. ಆದ್ದರಿಂದ ನಮ್ಮ  ಗಮನವು ಭಾರತೀಯ ರಾಷ್ಟ್ರವು ಚಿರಂತನ, ತೇಜಸ್ವಿ, ವೈಭವಶಾಲಿ ಹಾಗೂ ಐಶ್ವರ್ಯ ಸಂಪನ್ನವಾಗಲು ಪರಂಪರೆಯ ಪ್ರವಾಹವನ್ನು ಉತ್ಪನ್ನ ಮಾಡುವ ದಿಕ್ಕಿನಲ್ಲಿ ಇರಲೇಬೇಕು. ಇದು ರಾಷ್ಟ್ರದ ಸಂಪೂರ್ಣ ಜೀವನದ ಮೂಲಭೂತ ಅವಶ್ಯಕತೆ.